San Blas azoka eta aratusteak bertan behera utzi ditu Laudioko Udalak, "bizilagunak babesteko helburuarekin". Hala jakinarazi dute prentsa oharrean, "bi gertaerek udalerriko eta inguruko milaka lagun biltzen dituzte eta".
Maite Cortazar kultura eta jaietako zinegotziak azaldu duenez, ez da erabaki erraza izan udalarentzat: "Aurreko ospakizunekin hartutako ildoarekin eta neurriekin jarraituz, Eusko Jaurlaritzak ezarritako murrizketak betetzeaz gain, gure aratusteak bertan behera uztea beste aukerarik ez genuen, gero eta harrera hobea baitute".
Otsailaren 17an izan zen iaz mozorro lehiaketa:
Mozorro festei ez ezik, azokei ere eragingo die erabakiak. "Aurten ere ez da ospatuko San Blas jai tradizional eta maitagarria herritarren osasuna babesteko", zehaztu du zinegotziak. Ildo beretik, txarripaten lehiaketa, urritz makilena edota nekazal zein artisauen produktuen salmenta ere alboratuko dira, eta haurren jolasak, herri kirolak, kontzertuak edo herriko dantza taldeen erakustaldiak ere bai. Edozelan ere, Kukutxe San Blas elkartearen lana eskertu eta txalotu du udalak, urtero agertutako konpromisoagatik.
Otsailaren 3an izan zen 2020ko San Blas azoka:
Ziklokros proba, atzeratuta
Bestalde, otsailean jokatu ohi den Laudioko Nazioarteko Ziklokros proba atzeratzeko erabakia jakinarazi du Laudioar Txirrindulari Elkarteak. Aurreratu dutenez, pandemiaren bilakaerak baldintzatu du norgehiagoka, baina 2021ean zehar gauzatzea dute buruan.