Zozketa jarri du abian Altzarrate Kirol Elkarteak, Laudioko Udalaren eta APILL merkatari elkartearen laguntzarekin, herriko ostalaritza sektorea bultzatzeko helburuarekin. "COVID-19aren pandemiak gehien kolpatutako sektoreetako bat da ostalaritza", adierazi du Iñigo Egiguren Altzarrateko kideak.
Kirol Elkarteak gai sozialekin duen konpromisoaren eta bide-orriaren isla da azken egitasmo hau. "Aurretik ere kanpainak egin ditugu ostalaritza laguntzeko. Adibidez, maskarak banatu genituen herriko komertzioetan, eta Adurizek sinatutako kamiseta bat zozketatu genuen. Orain, urrats handiago bat emango dugu", azaldu du Egigurenek.
Egitasmoan parte hartzeko 2 euroko txartelak jarri dituzte salgai eta herriko jatetxe eta tabernetara bideratuko dute bertatik ateratako diruaren %100a. Txartelak datorren astetik aurrera egongo dira salgai ostalaritza establezimenduetan.
Zozketa abuztuaren 15ean egingo dute, Laudioko Jaien hasierarekin bat eginez. Zenbaki saritua egun horretako ONCEren zozketako berdina izango da. Irabazleak 3.000 euroko txartela eskuratuko du, herriko establezimendu laguntzaileetan gastatzeko. Bigarren sari bat eskuratzeko aukera ere egongo da: hainbat produkturekin osatutako saskia.
Altzarratek, bere ibilbide-orriari jarraituz, kanpaina berri bat abiarazi du Laudioko ostalaritzari laguntzeko, pandemiarekin gehien zigortua izan den sektoreetako bat den heinean.
— altzarrate.ke (@altzarrateke) January 26, 2021
Lagundu ostalaritzari sari handi bat jasotzeko aukerarekin.
SOS LAUDIOKO OSTALARITZA pic.twitter.com/DMwoDEYCoQ