Agerraldia egin dute Laudioko EH Bilduko kideek Jose Arrue kalean, bertan ireki baitute aurrerantzean koalizio abertzalearen egoitza izango dena: “ehBilgunea”. Hiru gelekin osatutako lokala da, eta bertan gauzatuko du talde politikoak orain arte udaletxeko bulegoan burutzen zuen jarduna.
Talde politikoa hamar urte betetzear dagoenean eman dute pausoa, Laudion “ziklo berri bat” irekitzeko asmoa. “Hamar urte Laudio koloreztatzen, orain dela hamar urteko ilusio berdinarekin amesten dugun Laudio eraikitzen. Udaletxean zein herrigintzan. Udaletxean ekarpenak eginez, proposamenak aurkeztuz, elkarlanerako eskua luzatuz, gauzak beste modu baten egin daitezkeela erakusten…”, adierazi du Amets Meatza Castañaresek, talde politikoko komunikazio arduradunak.
Egoitza bat baino gehiago
Nabarmendu dutenez, ireki berri duten lokala egoitza huts bat baino gehiago izango da. “Topagunea, lanerako gunea, eztabaidarako gunea, koalizioa sendotzeko gunea. Jende gehiago bilduko duen gunea, bilkideak (afiliatuak) batuko dituena, ideia gehiago, ahalegin gehiago... metatuko dituen lekua. Herri honetako ezker subiranista hedatzen jarraitzeko espazioa, alegia”. Horretarako, espazioa asteko egun zehatz batzuetan irekitzeko asmoa azaldu dute agerraldian, nahi duen orok bertatik igarotzeko aukera izan dezan.
Diagnosia
Meatzak kontatu duenez, herriaren errealitatea aztertzen igaro dituzte azken hilabeteak, eta diagnostikoa osatu dute horrela, aste honetan ospatutako herri batzarrean aurkeztu dutena. Hainbat faktore aztertu dituzte ikerketa horretan: “Herrian bizi dugun egoera sozioekonomikoa, kulturak bizi duen isolamendua, herri mugimenduaren gaitasun eta mugak, hizkuntza normalizazioa...”. Orain, ekarpenen fasea irekiko dute, “modu parte hartzailean Denon Laudio eta merezi dugun Laudio eraikitzen jarraitzeko”.
Kongresuaren atarian
Gutxi falta da EH Bilduren II. Kongresua gauzatzeko, eta horri begira ere ireki dute Laudioko lokala. “Aurrera jarraituko dugu urteak eta helburuak betetzen, eta lokal hau beste tresna bat izango da, bultzada hartzeko eta gure bizilagunen beharretara egokitutako eskaintza politiko batekin jarraitzeko balioko diguna”.