Laudioko EH Bilduk herriko kultura berpizteko berehalako irtenbidea eskatu dio EAJ eta PSE alderdiek osatutako udal gobernuari. Koalizioak azaldu duenez, herriko kultura "etenaldi batean" dago.
“Udalak kulturaren aldeko apustua egin beharko lukeela uste dugu. Arduratuta gaude kultura eragileen egoeragatik, iazko martxotik hona, ekonomikoki, sektore hau kaltetuenetarikoa izan baita, eta, aldi berean, herritarrek kulturaren beharra dutela sumatzen dugu. Segurtasun neurriak bermatuz gero, kultura ekimenak eta emanaldiak egitea posible litzateke, beste hainbat herritan horrela izaten ari da eta”, adierazi du Nagore Gomara zinegotziak.
Kultur etxeko obrak iraun bitartean bertako eragileei alternatibarik eskaini ez izana salatu du talde politikoak, bai eta berrikuntza lanen planifikazio eza ere. Gauzak hala, EH Bilduk premiazkotzat jo du talde kulturalen jarduerari oztoporik ez jartzea eta kultur etxeko lanen ondorioz lokalik gabe geratu diren eragileei alternatiba eskaintzea. “Eragile eta talde kultural asko dira azkeneko egunetan euren lana aurrera eraman ahal izateko espazio eta leku baten beharra aldarrikatu dutenak”, nabarmendu du Gomarak.
EH Bilduk kezka adierazi du ere ikastaroen etetearen ondorioz langabezian edota egoera prekarioan geratu diren langileekiko. Hori dela eta, ikastaroak berriro ere abian jartzea eskatu diote EAJ-PSEren udal gobernuari, segurtasun neurri guztiak mantenduz zein bide telematikoak erabiliz.
Gaiaren inguruan demagogiaz aritu eta polemika sortu nahi izana leporatu dio EAJk EH Bilduri
EAJren erantzuna
EAJk, bere aldetik, azaldu du alkatetzak ezohiko neurriak hartu behar izan dituela, COVID-19ak eragindako pandemia egoeraren ondorioz; "bizilagunen osasunerako arriskutsuak izan daitezkeen jarduera eta ospakizun soziokulturalak bertan behera utziz". Azken hilabetetan jende pilaketak sor ditzaketen ekitaldi ugari bertan behera utzi dituztela azaldu dute, hala nola, San Blasak, Dolumin Barikua, sanrokeak edota Olentzero eta Errege Magoen kalejirak.
Denboraldi batez ekitaldi eta ekintza kulturalak "sakrifikatzea" beste aukerarik ez dagoela jakinarazi du udal gobernuko taldeak, osasun-krisia gainditu eta lehenbailehen pandemia aurreko "normaltasun" egoerara itzultzeko itxaropenarekin.
Gaiaren inguruan demagogiaz aritu eta polemika sortu nahi izana leporatu dio EH Bilduri.
Udal espazioen eskasia
Herrian dagoen azpiegitura falta nabarmendu du EAJk, eta nabarmendu du "oso zaila" dela udal espazio alternatiboak bilatzea. "Egungo lokal publikoek eragotzi egiten dute ikastaroak behar besteko segurtasunarekin eskaintzea, eta egoera horri gehitu behar zaio Kultur Etxearen itxiera, gutxienez 2023ra arte, birmoldaketa-lanak amaitzen diren arte", adierazi dute jeltzaleek.
Laudion espazio falta dagoela ezaguna dela azaldu du EAJk, eta erabilera partekatua ezinbestekoa dela gaineratu du; azken udalbatzan onartutako ordenantzan jasotzen den moduan.
Ander Añibarro alkateak kezka adierazi du herriak bizi duen egoera sanitarioaren aurrean: "nire aldetik, arduragabekeria handia izango litzateke bizilagunak arriskuan jartzea; beraz, Eusko Jaurlaritzak finkatzen dituen neurriak eta mugak zorrotz betetzen jarraituko dugu".
Bestalde, Maite Cortazar zinegotziak azaldu du kultur arlotik harremana dutela kultur eragileekin: "Kultur arloak etengabeko harremana du Kultur Zaleak taldearekin, SOS Lamuza Parkearen oinordekoekin, eta Kulturkon elkartearekin, eta, aldi berean, kultura-ikastaroak esleitzen jarraitzen du, modu seguruan egin ahal izateko, bai modu presentzialean, ahal denean, bai telematikoki".