EH Bilduk “begi onez” ikusi du udalak parte hartze araudi berria egiteko prozesua ireki izana, baina hainbat ekarpen eta eskakizun egin ditu. Dokumentu hori osatzeko prozesu parte hartzaile “sakon eta sendoa” egitea eskatu dio udal gobernuari, “parte hartze araudi bat egiteko prozesua, definizioz, parte hartzailea izan behar duela” argudiatuta.
“Benetako parte hartzea ez da bakarrik iradokizunak, kexak edo ideiak jasotzeko aukerak ematea; harago doa, eta erabakietan, auzokide nahiz elkarteen parte hartzea bermatzean datza”, azaldu du Nagore Gomara zinegotziak.
Araudi proposamena
Araudi proposamena egin du oposizioko taldeak, hainbat aldaketa planteatuta: “kontzeptu orokorrak berregituratzea eta partaidetza-organoetan aldaketak egitea eta aurreikusita edo garatuta ez zeuden gai berri asko araudian gehitzea”.
Hiru ataletan banatu ditu koalizioak parte hartzearekin lotutako jarduerak: informazioa jasotzeko eskubidea, “ eskaera eta ekimena izateko” aukera eta eztabaidatu ahal izatea.
“Berrikuntza teknologikoak” txertatzeko beharra dagoela ere nabarmendu du EH Bilduk, “urrutiko eta aurrez aurreko parte-hartzea ahalbidetzeko”. Organoen sarea “handitzea eta zabaltzea” ere planteatu du.
Modu horretan, parte hartze dinamiketan Laudio “eredugarria eta aitzindaria izatea” nahi du koalizioak, eta horretan “elkarrekin lan egiteko” gonbita luzatu die alderdi guztiei.