Otsailaren 6an, atleten marka pertsonalak hobetzeko txapelketa bat antolatu zen Basauriko pistan. Laudio Atletismo taldeko ordezkaritza zabal batek hartu zuen parte bertan. Laudioarrak hiru kategorietan neurtu ziren: 400 eta 1500 metroko lasterketan eta jauzi hirukoitzean. 1500 metrotan aritu ziren Laudioko atleta gehien. Iñaki Galindezek lortu zuen klubeko markarik onena, 4:40.
Ane Lopez, Tomas Laso, Unai Garcia eta Endika Arrazuria ere aritu ziren kategoria horretan lehian. 400 metroko lasterketan Oihane Ofogok, Aitana Delgadok eta Pello Gomezek hartu zuten parte.
Eguneko protagonista Oneka Bergara izan zen. Jauzi hirukoitzean 8,42 metroko marka estreinatu baitzuen Bergarak.Laudio Atletismo Klubeko kide den Alberto Talledok positiboki baloratu du larunbateko txapelketa: "Federazioaren txapelketetan parte hartzea baimendu du Jaurlaritzak, eta hori oso garrantzitsua da atletentzat, txapelketetan jasotzen baitira entrenamenduetako fruituak".
Laudioko Atletismo Klubak uda ostean ekin zien berriro entrenamenduei, eta unean uneko neurrietara egokituz, etenik gabe ari dira atletismoa praktikatzen.