Protesta ekimen irudimentsua egin dute Tubacexeko langileek gaur goizean, zuzendaritzako eta bulegoetako kideak fabrikara sartu direnean. Gorriz eta zuriz jantzita agertu dira beharginak, egunkariak eskutan, eta San Ferminen parodia bat antzeztu dute, "San Celestini" abestuz. Celestino Danis gerentearen dimisioa eskatu dute horrela.
Langile baten aurkako salaketa
Ertzaintzaren presentzia handia izan da goizean zehar, aurreko egunetan bezala. Langile batzuk eserialdia egin dute fabrikaren sarreran, lanera joandakoen autobusa sartzea oztopatzeko. Tentsio uneak bizi izan dira eta Ertzaintzak langile bat atxikitu du. Behargina identifikatu du poliziak, eta salaketa jarriko diola esan du.
Bihar, Amurrion
Bihar Amurrion egingo dute mobilizazioa beharginek, 10:30ean fabrikako sarreratik abiatuta. Pozik azaldu da Enpresa Batzordea grebaren orain arteko jarraipenarekin, "ia erabatekoa" izan dela nabarmenduta.
ELAren sail sindikalak, bere aldetik, oharra bidali die bere afiliatuei zuzendaritzarekin egingo diren bileren berri emateko. Sindikatuko kideek azaldu dute enpresako kontuen, eskaera-zorroaren eta beste lantegietako egoeren informazioa eskatu dutela, ez dituztelako kaleratzeak egiteko emandako arrazoiak ulertzen. "Horrelako neurri bat gauza ziurretan oinarritu behar da, eta une honetan dugun ziurtasun bakarra da aldi baterako krisi batean gaudela. Horregatik, neurri koiunturalak eskatzen ditugu".
Astebete borrokan
Duela astebete abiatu zuten Tubacexeko langileek 150 kaleratzeen aurkako borroka zikloa. Ostegunean egin zuten lehen greba eguna, eta mila pertsona baino gehiago bildu ziren arratsaldean eginiko mobilizazioan:
Ostiralean kotxe karabana eta piketeak egin zituzten:
Astelehenean abiatu zuten greba mugagabea, eta ekimen berezia egin zuten haurrekin, langileen egoeraren atzean familiak daudela erakusteko:
Astearte eta asteazkenean ohiko eskema jarraitu zuten protestek: piketeak egin zituzten goizeko lehen ordutik Laudio eta Amurrioko fabriketan. Tentsio uneak bizi izan ziren, baina ez zen kargarik egon: