Gaur abiatu da Kutxa Bira egitasmoa, Argentinan, Viedmako Aberri Etxea euskal etxean. Iparra Hegoa elkarteak antolatu du ekimen ibiltaria.
Diasporako hainbat gune bisitatuko ditu egitasmoak, eta apirilaren 8an iritsiko da Euskal Herrira. Herriz herri egingo du salto Kutxa Birak, maiatzaren 30ra arte.
Egurrezko kutxa bat izango da ekimenaren protagonista. Herri bakoitzak mezu bat sartu beharko du kutxaren barruan. Modu horretan, Euskal Herri osoko aldarriak bilduko dituzte. Mezu orokor bat ere egongo da kutxaren barruan, Amets Arzallus bertsolariak idatzitakoa. Mezu guztiak irakurriko dituzte azken egunean egingo dute ekitaldian.
Apirilaren 29an Laudion
Apirilaren 29an bisitatuko du ekimenak Aiaraldea, Laudiora iritsita. Herrian lan-talde bat osatu da egun horri begirako egitaraua osatzeko eta aurrerago emango dute antolatuko dituzten jardueren berri.
Aurten egingo dute Kutxa Biraren lehen edizioa eta, ahal dela, azkena izatea espero dute, Iparra Hegoa elkarteko kideek zehaztu dutenez. Izan ere, pandemiaren ondorioz egin izan ez diren beste ekimen batzuk behin behinean ordezkatzea da ekimenaren xedea. “Korrika, Herri Urrats, Durangoko Azoka, Nafarroaren Eguna eta halako festak ez egiteak kalte emozionalak eta nortasun kalteak eragin dizkigu, eta horren ondorioa da Kutxa bira”, azaldu du Pello Arazabalek, Iparra Hegoako kideak.