Munduko Nobull CrossFit Open Txapelketako 3. fasera igaro da Oihana Moya. Asteburuan egin zituzten 2. faseko azken probak, eta emaitza oparoak lortu zituen kirolari laudioarrak bertan: Espainiako Estatuko lehena izan zen, 27. geratu zen Europako sailkapenean eta 80., aldiz, mundukoan. “Ostiral, larunbat eta igandean egin genituen probak”, azaldu du Moyak, “egun bat lehenago jakinarazten ziguten zer egin behar genuen”.
Kirolaria oso pozik azaldu da lortutako emaitzarekin. “Ez nuen espero, baina honi esker ikusten dut gaitasuna eta maila dudala hor egoteko, eta horrek asko motibatzen nau”. Salto handia dago norgehiagokaren 2. eta 3. faseen artean, probak telematikoki egitetik presentzialki egitera pasako direlako. “Ekainean izango dira norgehiagokak, Holandan eta Alemanian, baina oraindik ez dakigu non egokituko zaigun bakoitzari”.
Europako 60 onenak neurtuko dira bi herrialde horietan, eta lehenego bostak igaroko dira azken fasera, mundukora. Moyak aitortu du “urduri” dagoela, ariketak bere ohiko entrenamendu gunean eta konfiantzazko lagunen artean egitetik gainontzeko parte hartzaileen aurrean egitera igaroko delako, baina “gogotsu” dago erronka berriari heltzeko. Hemendik eta ekainera entrenamenduetan murgilduko da buru-belarri, txapelketa hau baita aurtengo bere erronka nagusia.