Otxorreta, Atxandita inguruetan ardietara edo beste zereginetara joatean zure parera hurbildu nahi genuen eta ezin, gu gazteagoak izan arren. Guk abiadura handitzean ez genuen denbora murriztea lortzen, alderantziz, zure eta gure arteko distantzia handitzen zen, espero genuenaren kontrako efektua lortuz.
Igandetan etxekoren batek esan zuen:
-Gaur Villosak etxean jokatzen du.
-Zergatik dakizu?
-Jose badoa oinez partidara eta!
Hurrengo egunean, zugana joaten ginen berrien bila.
-Son unos mataos- esaten zenuen galduz gero.
Hildako horiek berberak berpiztu eta hurrengo partida irabaztean…
-Aurten baietz mailaz igo Villosak - esaten zenuen irriño batekin.
Luze bizi izan zara, Jose, 93 urte. Beti oinez pauso arinean edo korrika mugituz hona eta hara. Zure energia autonomoa erabili duzu gure planetaren errekurtsoak alferrik agortu barik. Benetako bizitza ekologikoa eta iraunkorra bizi izan duzuna eta, gainera, poz-pozik.
Lusurbeilanda baserrian jaio, bizi eta hil nahi izan duzu eta baita lortu ere. Zorionak Jose! Balentin Orueta eta Segunda Etxebarriaren seme baserritar zintzo eta zuzena. Jende askoren gogoan gelditzen zara, Jose.
Jose Luis Orueta Etxebarria, hil berri den laudioar laguna, maitasunez eta miresmenez gura dugu gogoratu berba xume hauen bitartez.
Andoni, Josu, Gurutze, Ainhoa eta Unax, beti aurrera eta gora bihotzak!
Zuon auzokideak.