Hainbat herrialdetatik etorritako gazte boluntarioak elkartuko dira Laudion uztailaren 19tik abuztuaren 2ra. Arabako Gaubea eta Arraia-Maeztu udalerriekin batera, Laudion ere burutuko da aurten ondare historikoaren eta naturalaren kontserbazioa helburu duten nazioarteko boluntariotza programa.
"Aldi batez elkarrekin bizi eta gizarte osoarekin zerikusia duen proiektu batean parte hartzea" da egitasmoaren funtsa. Hain zuzen, Ermualdeko bidezidorrak, karobia eta elur-zuloa atonduko dituzte 18 eta 26 urte bitarteko boluntarioek. Nazioarteko kanpaldia izanik, ingelesa izango da auzolandegien hizkuntza nagusia, baita egingo dituzten gainerako aisialdi-jardueretakoa ere.
Aurretik, beste auzolandegi txanda batek lan berdinei ekingo die uztailaren 5etik 19ra. Lehenengo txanda horretan Euskal Herriko eta Espainiar Estatutik etorritako gazteek hartuko dute parte, eta euskaraz zein gaztelaniaz egingo dituzte jarduerak.
Auzolandegiak Aiaraldean
Eskualdean egin dira aurretik antzeko proiektuak. Tertangako Ubiros Errota, esaterako, auzolandegietako dozenaka gazteren laguntzarekin zaharberritu zen.