Udal Gobernuak Laudioko Kultura Plana diseinatzeko "ustekabean" deitutako topaketa salatu du EH Bilduk. Plan estrategikoaren diseinuari aurkakotasuna adierazi dio horrela koalizio abertzaleak, aurreko urteetan herriko eragileekin batera egindako lana aintzat hartzen ez dela argudiatuta.
“Udalaren gardentasun eza agerian geratu da Kultura planaren diseinuan, eta prozedurari buruzko nondik norakoak argitzea eskatzen dugu”, adierazi du Nagore Gomara bozeramaileak.
EH Bilduk gogorarazi du 2020ko aurrekontuetan 35.000 euroko partida bat jaso zela egitasmo hori aurrera eramateko. Partida hori exekutatu gabe geratu zen eta ez da 2021eko aurrekontuetan sartu, "gobernu taldeak berak emandako hitza ez betetzeagatik" .
Prozesu parte hartzailea
Koalizioak Udal Gobernuari gogorarazi dio gaiari heltzeko prozesu parte hartzailea 2016an hasi zela, SOS Lamuza Parkea Plataformarekin egindako topaketan eta Laudioko Kultur Ekosistemaren Mapaketan. "Udalaren webgunean eskuragarri dago mapaketaren txostena. Gure ustez, egokiagoa litzateke hasitako aurre-lanketa hori oinarritzat hartuta gaur eguneko lanari jarraipena ematea, eta ez behin eta berriro gauza bera errepikatzea eta hutsetik hastea”, ohartarazi du Gomarak.
EAJ eta PSE alderdiek osatutako gobernuari leporatu diote ere Kultur Kontseilua deitu ez izana. "Kultur Kontseiluaren lehenengo bilera batean jaso ziren kulturgintzaren eremuaren, laudioar eragile kulturalen eta pertsona partikularren behar nagusiak", defendatu du EH Bilduk, “ez gaude kultura plana osatzearen kontra, baina diru publikoa den heinean, uste dugu laudioarrekiko errespetuz eta batez ere, aurreko prozesuetan parte hartu izan dutenen begirunez egin behar dela; lan horiek administrazioak bete beharreko urratsak eginez gara daitezen eskatzen dugu, eta EAJ-PSE gobernu taldeak horrenbeste saltzen duen gardentasunarekin eta dagokion espedientearekin”.