Novaltia enpresako grebalariek Laudio bisitatu dute gaur. Kooperatiba bat da Novaltia, eta hainbat farmazia dira jabeak. Gauzak hala, enpresako bazkideak diren Laudioko botiketara jo dute langileek, euren aldarriak plazaratzeko.
2019. urtean ekin zioten greba mugagabeari, lan hitzarmenaren alde. Salatu dutenez, enpresak 2019. urtean kendu zien hitzarmena, eta hainbat lan baldintza ezarri zituen:
- Soldata-eskala bikoitza: Kontratatu berriek %35 gutxiago kobratzen dute.
- Gutxiengo soldatatik oso hurbil dauden lan-sariak.
- Erabateko malgutasuna, igande eta jai-egunetan lan egitera derrigortuta.
- Azpikontratazioak eta kontratu prekarioak.
Laudioko kaleak zeharkatu ostean, Tubacexera jo dute Novaltiako grebalariek, bertako piketean zeuden langileei elkartasuna adieraztera.
Gaurkoa ez da izan lantegi horretako grebalariek Laudio bisitatu duten lehen aldia. Iaz bi aldiz egon ziren herrian:
Langileek nabarmendu dute Novaltiako jabeak diren farmaziek "erantzukizun zuzena" dutela egoera honetan. Lan ikuskaritzaren "jokabide konplizea" ere salatu dute, "beste alde batera" begiratzea leporatuta.
Hala ere, grebalariek ziurtatu dute "irmo eta indartsu" daudela. "Greban jarraitzen dugu, mobilizatzen, Novaltiaren eta farmazien jokabidea salatzen eta prekarietatearen aurka borrokatzen, hitzarmen propio duina lortzeko".
Argazkiak: Aiaraldea.eus eta ELA sindikatua