EAJ-PSE gobernu taldeak gaur arratsaldean aurkeztuko du 2021eko inbertsio plana. EH Bilduren udal taldeak inbertsio planaren alde egingo du, koalizioak 2021eko aurrekontu eztabaidan aurkeztutako proposamen ugari aintzat hartzen dituelako dokumentuak.
“Inbertsio plan honetan guk egindako ekarpenetako asko jasotzen dira, eta laudioarron alde urrats bat aurrera egingo dugu oraingoan ere”, azaldu du Santi Hernando EH Bilduko zinegotziak.
2021eko aurrekontu-eztabaida
2021eko kontu publikoen aurrekontu-eztabaidari begira, EH Bilduk azaroaren 9an erregistratu zuen inbertsio-proposamen sorta bat, "udalerriko gizarte, kultura eta kirol eragile askoren eskariarekin bat datorrena".
Baina EAJk eta PSEk osatzen duten udal gobernuak uko egin zion proposamen horiek aztertzeari eta eztabaidatzeari, EH Bilduk salatu duenez. Proposamenek, ordea, behin betiko inbertsio planean isla izan dutela adierazi du Hernandok: “Gobernu taldeak askotan esan digu gure ekarpenak ez direla onak, baina oraingoan hala izan ez direla adierazi digute, horietako asko baitira gaur arratsaldean bozkatuko ditugunak”.
Gauzak horrela, inbertsio planari aldeko botoa emango diotela aurreratu dute EH Bilduko zinegotziek, eta herritarren bizi kalitatea hobetzeko akordioak erdiesteko prestutasuna adierazi dute. "Laudioarron beharren alde egiteko borondatea dagoenean ez dago akordioetara heltzeko arazorik", nabarmendu du Hernandok.