Prentsaurrekoa eskaini du gaur Laudioko Udalak txakurren aisialdirako guneei buruz. Izan ere, Ander Larrinaga alkateordeak azaldu duenez, martxoan aho batez onartu zen horri buruzko mozioa udalbatzan.
Gauzak horrela, 9 kokapeneko proposamena prestatu du tokiko erakundeak. Larrinagak argitu du ez dela proiektu itxia: "hau jarri dugu oinarri gisa, herritarrek ekarpena egin ditzaten, baina laudioarrek ideia hobeak izan ditzakete".
Kokapen horiek guztiek gutxieneko azpiegitura izango dute: zaborrontziak, gorotzak jasotzeko poltsak, ura, bankuak kasu batzuetan... Gainera, "agility" eremu bat atonduko da, txakurrek ariketa fisikoa egin dezaten.
Alkateordeak nabarmendu du animaliak solte egoteko esparruak izango direla eta potentzialki arriskutsuak izan daitezkeen txakurrak ezingo direla lotu gabe egon, legeak horretara behartzen baitu.
9 guneak
Zehazki, udalak pentsatu dituen aisialdi eremuak hurrengo tokietan egongo lirateke:
- Lamuza parkean: Bolatokitik parkearen amaierara arte. 3.000 metro karratu inguru. Han eraikiko litzateke "agility" espazioa.
- Arraño: Mendian, aparkalekuaren eta gurutzearen artean.
- Ugarte: Sagastin, 1.500 metro karratuko zabalerarekin.
- Bide zaharrak: Villosako parkean. Ordutegi mugatua izango luke, kamioien trafikoa handia baita eta arriskutsua izan daiteke. 19:00etatik 08:00ak bitartean egongo litzateke irekirik.
- Areta: Pinudien pasealekua, Gasteiz kalean. 1.700 metro karratuko tokia.
- Latiorro: Egungo "pipicana" aisialdirako gunea bilakatuko litzateke, txakurrak aske egoteko.
- Gardea: Eliza eta kirolgunearen artean.
- Hirugurutzeta: Laurak tabernaren alboko parkea. Horrek ere ordutegi mugatua izango luke.
- Landaluze: Parkean, ordutegi mugatuarekin ere.
Parte hartzea
Bi bide irekiko ditu udalak herritarrek iritzia emateko. Alde batetik, udal webgunea (www.laudio.eus) eta, bestetik, udaletxean jarriko den postontzia. "Espazio fisiko gehiago ahalbidetzea pentsatzen ari gara", iradoki du Larrinagak.
Guztira, 20.000 euro inguruko inbertsioa egitea aurreikusi du udalak.