Omniaren udal-taldeak bi mozio aurkeztu ditu maiatzaren 31ko Udal Osoko Bilkuran eztabaidatuak izan daitezen. Aurkeztutako lehenengo mozioak Aiarako Kuadrillaren egoitza du eztabaidagai; bigarrenak, aldiz, udal kiroldegiko bazkideen kuotari ezarritako deskontua.
Kuadrillaren egoitza
Aiarako Kuadrillaren egoitza Laudioko Udaletxe zaharrean kokatzea aldarrikatuko du Omniak datorren asteleheneko bilkuran. Udal taldeak Azaroaren 29ko 63/1989 Foru Arauko 6. artikuluak jasotakoan oinarritu du bere eskakizuna. Artikuluak honakoa dio: "Amurrio, Artziniega, Aiara, Laudio eta Okondo udalerriek osatzen dute Aiarako Kuadrilla, eta bere egoitza Laudion kokatzen da".
Omniaren iritziz, araua argia da, eta hau betetzea besterik ez da geratzen. "Egoitza Laudioko Udaletxe zaharrean kokatzea aurrerapauso handia izango da Kuadrillatik egiten den lan guztia ikustarazi eta balioan jartzeko" adierazi dute mozioan.
Kiroldegia
Udal taldeak aurkeztutako bigarren mozioa udal kiroldegiko kuota du hizpide. Izan ere, 2020ko abenduaren 31aren aurretik dagoeneko kiroldegiko bazkide zirenei %50eko kenkaria egingo zaie 2021eko tasan, kiroldegiko azpiegitura ugari ezin baitira erabili oraindik. 2021eko urtarrilaren 1etik aurrera izena-eman dutenei, ordea, ez zaie deskontu hori aplikatuko.
Omniarentzako "ulergaitza" da bazkideen arteko desberdintasun hori: "Bat egiten dugu deskontuarekin, baina deskontu hori berdina izan behar du erabiltzaile guztientzako, kirol instalazioak berdinak baitira".
Alderdi laudioarrak salatu du ez duela gai horren inguruko erantzunik jaso udal gobernuaren partetik, Udal Osoko Bilkuretan gaia mahaigainean jarri arren. Horregatik, mozioa aurkeztuko dute, bazkide guztiek deskontu berdina jaso dezaten.