'Utopia eta bere atsekabeak' gai bezala hartuta, saiakera aurkeztu zuen Ane Murga Penas Laudio Institutuko ikasleak Filosofia Olinpiadara, eta bere lana Espainiako Estatuko saiakera guztien artean hautatua izan da. Beste ikasle batekin batera, Nazioarteko Filosofia Olinpiadan ari da parte hartzen asteburu honetan zehar.
Eslovenian egin behar zen nazioarteko lehiaketaren finala baina, pandemia egoera dela medio, online egin behar izan dute. 56 herrialdetako 150 ikaslek parte hartuko dute norgehiagokan. Gaur bertan bost ordu izango dituzte gai zehatz baten inguruko saiakera berri bat idazteko, eta igandean iragarriko dituzte irabazleak.
Plataforma berezi bat erabiliko dute parte hartzaileek saiakera idazteko. Modu horretan, kanpoko erreferentziak bilatzea edo laguntza jasotzea ekidingo dute. Gainera, parte-hartzailearena ez den ikasketa hizkuntzan idatzia egon behar du. Murgak, esaterako, ingelesez idatzi zuen bere lehen saiakera.
Asteburu osoko egitaraua
Nazioarteko Filosofia Olinpiadan parte hartzeko aukeraz gain, asteburu osoko egitarau oparo batez gozatzeko aukera ere izango dute 150 parte hartzaileek. Antolakuntzak eztabaida, hitzaldi eta mahai-inguru ugari antolatu ditu, ospe handiko pentsalarien presentziarekin: Noam Chomsky edota Peter Singer, esaterako. Esteka honetan ikus daiteke egitaraua osorik.