Omniaren udal taldeak oharra plazaratu du kritikatzeko Laudioko udal gobernu taldeak duen jarrera udalbatzetan eta batzordeetan. Alderdi independentearen aburuz, "boterea burura igo zaie" eta harropuzkeriaz jokatzen dute EAJk eta PSE-EEk. Omniaren ustez, jarrera horrek laudioarren interesen kontra egiten du.
Hiru adibide jarri dituzte hori argudiatzeko. Lehenik eta behin, maiatzean eztabaidatutako mozioa -Omniak berak proposatuta- kiroldegiko bazkide berriek kuota erdia ordaintzeko, aurretik bazkide zirenen kopuru bera, alegia. Joseba Amondok erantzun zien udalbatzan aurretik esan ziela ez zutela hori egingo. Omniak azpimarratu du udala bazkide berriak baztertzen ari dela eta ez duela aintzat hartzen laudioarren kaltea.
Apirileko Udal Osoko Bilkura ere izan du hizpide Omniak, salatuta EAJk eta PSE-EEk uko egin ziotela mozio bat adosteari, Larrialdiko Laguntzen ordainketaren atzerapenak konpontzeko.
Aiarako Kuadrillaren egoitzaren afera
Azkenik, Omniak Aiarako Kuadrillaren egoitzaren afera hartu du udal gobernu taldearen jarrera irudikatzeko. Alderdi laudioarrak ziurtatu du egoitza hori, legez, Laudion egon behar dela eta, ondorioz, ez dagoela eztabaidarik horretan. Hori argi uzteko, mozioa aurkeztu zuten eta EAJk eta PSE-EEk beste bat eraman zuten udalbatzara, Aiarako Kuadrillak berak hausnartu dezan zein izan behar den azpiegituraren kokapena. Omniaren iritziz, prozedura hori baliatzen dute sozialistek eta jeltzaleek laudioarren mesederako ez diren erabakiak hartzeko eta euren interesekoak ez diren ekimenen aurka egiteko, ezezko botoa ematera mugatu ordez.