JEZ enpresako lan hitzarmena sinatzeko bidean dago jadanik. Oraindik azken dokumentua berrikusi, sinatu eta Eusko Jaurlaritzara bidali behar den arren, prozesuaren zatirik zailena gainditu dute bi aldeek.
Behin betiko 10 kontratu
Izan ere, gatazkak baldintzatutako urte honetan, sindikatuek lehentasuna eman diote enplegua mantentzeari. Horrela, gehien borrokatu duten puntua izan da indarrean dauden errelebo kontratuak behin betiko kontratazioak bilakatzea.
Horrek ez du esan nahi, ordea, kontratu mota hori duten 10 langile horiei eskainiko zaizkiela postuak. "Behin behineko kontratuak dituzten beste beharginei ere proposatu diezaieke enpresak behin betikoa. Gure helburua da 10 lanpostu horiek modu prekarioan ez betetzea edo ez suntsitzea", azaldu dute iturri sindikalek.
Edonola ere, bestelako hobekuntzak jasoko ditu lan hitzarmenak. Esaterako, bulegoetan ordutegien malgutasuna zabalduko dute, adingabeen zaintza -eskolako ordutegiak- bateratzeko betebehar profesionalekin.
Alde ekonomikoa
Horrez gain, esparru ekonomikoan ere eragin positiboa izan du akordio berriak, ELA eta LABen ustez. Berez, aurten 200 euroko aparteko ordainketa jasoko dute eta hurrengo urtean 220 eurokoa. KPIren igoera kopuru hori baino handiagoa izango balitz, osatuko litzateke zenbaki horretara heldu arte. Langile ordezkarien aburuz, "mesedegarria da lineala izatea aparteko soldata hori, berdin eragingo baitie gehien zein gutxien kobratzen dutenei".