Madrilen egon da Ander Urkiza ekainean, Espainiako Tenis Txapelketan parte hartzen. Kimu kategorian lehiatu zen Laudio Tenis Klubeko kidea, Euskadiko Txapelketa irabazi eta gero. Klubeko entrenatzailea, Andoni Agirretxe, ere bertaratu zen, kapitain moduan lehiatzera, sei umerekin.
Final-zortzirenetan kanporatu zuten Urkiza, baina oso ondo aritu zen norgehiagokan, Agirretxek azaldu duenez: “Ikaragarria izan zen. Lehen partidan Zaragozako mutil bati irabazi zion. Hiru ordu eta erdi iraun zuen partiduak”.
Hurrengo norgehiagokan, aldiz, ez zuen gailentzerik izan, Espainiako Estatuko sailkapenen gorenean dagoen jokalari baten aurka aritu zelako. “Oso ondo lehiatu zen”, ziurtatu du entrenatzaileak, eta esperientzia “hunkigarria” izan zela nabarmendu du. “Kontuan hartu behar da Ander bost urte zituela hasi zela klubean. Bere ibilbide osoa jarraitu dugu”.
Udalekuak antolatu dituzte tenis klubeko kideek, "kirola eta hizkuntzen ikasketa uztartzeko"
Urte hauetan guztietan klubak izan duen garapena goraipatu du Agirretxek: “hasi ginenean ez genuen pista bat ere. Orain, aldiz, bi pista ditugu eta neska-mutiko asko daude entrenatzen”.
Udalekuak
Lehiaketak amaituta, udalekuetan buru-belarri sartu dira Laudio Tenis Klubeko kideak. Kirola eta hizkuntzak dira egonaldien ardatzak. “Euskara eta ingelesa baliatzen ditugu klaseetan”, nabarmendu du Agirretxek, “sei astez luzatuko dugu ekimena, eta lehen hiru asteetako plazak beteta daude dagoeneko”.
Datorren ikasturteari begira
Irailetik aurrera, orain arteko helburu berari helduko diote klubeko kideek: “hazten jarraitzea”. Tenis eskola izango dute horretarako lanabes. “Oso talde osatua gara, beteranoak eta haurrak ditugu”. Horregatik, “hobetzeko tarte handia” dutela uste du Agirretxek: “orain tenis pista estalia dugu, eta asko laguntzen digu klaseak ematerako orduan”.
