Laudio Glass Hub proiektua aurkeztu du Laudioko Udalak. Laudio "Europako beiraren erreferente" bihurtzea da egitasmoaren xedea, udalerrian material hori lantzen duten lau enpresa (Guardian Glass, Guardian Automotive, Vidrala eta Trabeira) daudela kontuan hartuta.
Laudio "lurralde estregiko gisa kokatzea” da ekimenaren helburua, “beiraren sektorean”. Hala azaldu du Ander Añibarro alkateak. Hiru proiektu garatu nahi dituzte helburu horri begira: “Beiraren teknologia eta berrikuntzarako zentro bat eraikitzea, beste prestakuntza-gune atontzea bat eta MICE turismoa sustatzea”.
Lehen proiektuaren bidez, “sektoreari lotutako ikerketa eta berrikuntza-ekosistema” sortu nahi dute, “sektorearen europar ezagutza eta berrikuntza” Laudion zentralizatzeko eta, modu horretan, “udalerrian bertan ikerketa eta testatzea bultzatzeko”.
Bigarren ekimenaren bidez, udalerriko Lanbide Heziketa eskaintzan eragin nahi dute, “hainbat sektoretan gradu eta ziklo berriak txertatuz eta beiraren sektoreko prestakuntza aitzindaria sartuz”.
Hirugarren ekimenarekin, aldiz, “Laudio marka” indartu nahi dute, “tokiko turismo-planarekin bat etorriz”.
Elkarlan publiko-pribatua ardatz
Elkarlan publiko-pribatua sustatu nahi dute horretarako. Iragan uztailaren 9an egin zuten lehen saioa arestian aipatutako enpresekin, “proiektua aurkezteko, haien beharrak ezagutzeko eta parte-hartzea sustatzeko”. Eusko Jaurlaritzari eta Arabako Foru Aldundiari ere plazaratu diete proiektua, eta interesa erakutsi dute.
Udalaren arabera, Laudiok “kokapen geografiko pribilegiatua” du horrelako ekimen bat aurrera ateratzeko: “Igarobidea da eta Arabako hiriburua eta Bilboko Portua lotzen ditu. Hori dela eta, udalerria funtsezkoa da salgaien trafikorako”.