Garaile atera zinen larunbatean Larrinbeko Sari Nagusian. Espero zenuen?
Ez, ez nuen espero. Ondo ezagutzen nuen ibilbidea, eta banekien non estutu behar nuen eta non ez.
Apurka apurka hobetzen noa. Ikasten ari naiz non azkartu behar dudan abiadura eta non ez, eta energia gutxiago gastatzea ahalbidetzen dit horrek. Lasterketaren amaiera, gainera, niretzat egina zirudien: igoera bat zen, eta mota horretako metetan ondo moldatu izan naiz beti. Aurrean jartzeko baliatu nuen eta horrela lortu nuen gailentzea.
Aldapa gora zara trebea, beraz.
Bai, aldapan goran edo portu txikietan, bi kilometro ingurukoak.
Hau da orain arte lortu duzun garaipenik handiena, ez?
Bai. Lehenengo urteko Infantiletan hasi nintzen. Kadeteen lehen urtean bi lasterketa irabazi eta podium batzuk egin nituen. Bigarren urtean bi podium egin nituen, hirugarren postuan, eta torneo batean liderra izatea ere lortu nuen.
Jubenilen lehen urtean nago orain, eta larunbatekoa izan da kategoria honetan lortu dudan lehen garaipena. Baina ostiralean kronoeskalada bat egon zen, oso gogorra, eta hirugarren postua lortu nuen.
“Nik ez dut entrenatzailerik, nire kabuz planifikatzen ditut entrenamenduak, egun bakoitzean ditudan gogoen arabera”
Proba gehiago dituzu agendan?
Bai, gaur itzuli batekin hasiko naiz, Nafarroan. Postu onak lortzea espero dut. Podiumen bat egitea gustatuko litzaidake, eta taldeko kideren batek irabaztea.
Txirrindularitza talde kirola dela esango zenuke?
Bai. Taldekideok elkar lagundu behar gara.
Larunbateko garaipenaren ostean, erronka handiagoak jarri dizkiozu zure buruari aurrera begira?
Orain arte bezala jarraitzeko asmoa daukat, ahal bezain postu onenak lortzen eta onena ematen lasterketetan zein taldean. Beste lorpenen bat erdiesten badut, askoz hobe.
Nolatan hasi zinen txirrindularitzan?
Bost urte daramatzat dagoeneko lasterketak egiten. Triatloiak egin nahi nituelako hasi nintzen bizikletan. Aiarabike taldean hasi nintzen entrenatzen, eta asko gustatu zitzaidan. Horregatik, txirrindularitzan soilik aritzeko pasa nintzen. Krosak egin nituen, baina aurten utzi egin dut. Bi triatloi egin nituen soilik, baina duatloiak ere egin ditut, oso gogoko ditut.
Zergatik erabaki zenuen txirrindularitzan zentratzea?
Gustukoago dudalako eta lagun berriak egiteko balio izan zaidalako. Oso giro ona dago taldean.
Nola daramatzazu entrenamenduak? Aldaketa handia nabaritu duzu Kadeteetatik Jubeniletara?
Nik ez dut entrenatzailerik, nire kabuz planifikatzen ditut entrenamenduak, egun bakoitzean ditudan gogoen arabera. Astero lau egunez aritzen naiz bizikletan. Bi ordu inguru egiten ditut egunean, bataz beste. Orozko, Urduña, Arespalditza edota Artziniegatik entrenatzen dut.
Barne-diziplina handia behar duzu, orduan.
Batzuetan ez dut gogorik eta berdin berdin ateratzen naiz. Orain, udan gaudenez, arrazagoa da. Ikasturtean zehar, aldiz, klasetik atera ostean entrenatzen dut, eta ikasi egiten dut gero.
2. Batxilergoa egingo duzu datorren ikasturtean. Zaila ikusten duzu ikasketak eta entrenamenduak uztartzea? Zer asmo dituzu datozen urteei begira?
Ikasketak eta txirrindularitza uztartuko ditut. Beharrezkoa da ikastea, baina baita gustuko dituzun gauzak egitea ere. Ni pertsona ordenatua naiz eta ondo uztartzen ditut bi gauzak.
Horrela jarraitzea da nire asmoa: postu onak lortzen eta gustura egoten.