2021-2022 ikasturtean bertso-eskolak egingo dira Faktorian, Arabako Bertsozale Elkartearen eta Aiaraldea Ekintzen Faktoriaren eskutik.
"Jada urte batzuk dira bertso-eskolen transmisioa etenda dagoela gurean, eta eskoletan lantzen den bertsolaritzaz gainera, ez dagoela bestelako aukerarik... bertsolaritzaren bidez lantzen diren balioak, ahozkotasuna, hizkuntzarekiko maitasuna eta zaletasuna... Horiek guztiak berreskuratzea dugu xede proposamen berri honekin", azaldu dute egitasmoaren antolatzaileek.
Izena emateko epea irailaren 19an bukatuko da. Ikastaroan parte hartzeko www.labur.eus/bertsofaktoria helbidean dagoen galdetegia bete eta bidali behar da. Behin inskripzioak osatuta, bi talde bereiziko dira: batetik, haur eta nerabeena (8-14 urte bitartekoak) eta, bestetik, gazte zein helduena (15 urtetik aurrera).
Ekintza urritik ekainera gauzatuko da, Faktorian (Laudio), astean behin. Egunak zehaztu gabe daude. Izan ere, partaideen arabera zehaztuko da noiz egingo den ekimena. Bestalde, urteko kuota 50 eurokoa izango da.
Aipatzekoa da irailaren 26an (igandea) bertso-eskolaren aurkezpen jaia egingo dela 17:00etan Faktorian. Bertan bertsoez, musikaz eta askari agroekologikoaz gozatzeko aukera egongo da.
