Bihartik aurrera, eta azaroaren 10era arte, Laudioko Kultura Etxean 'Itzalpeko emakumeak' erakusketa ibiltaria egongo da ikusgai. Honen bitartez, Laudioko Udalak XX. mendeko historian euskal emakume anonimoen ekarpenak berreskuratu eta zabaldu nahi ditu. Tolosan estreinatu zen lehen aldiz joan den otsailean, eta Laudiora helduko da orain.
Laudioarrek euskal emakumeek Gerra Zibilean eta gerraostean jasandako abusuak eta indarkeriak ezagutzeko aukera izango dute Sabino Arana Fundazioaren erakusketa honen bidez. Halaber, erakusketak baldintza gogor haietan gizarteko hainbat alorretan gailendu ziren emakumeen ekarpenak azaleratuko ditu.
Erakusketak aldeko ez zuten gizarte batean lagundu zuten laudioarren eta Aiara bailarako emakumeen bizipenak bilduko ditu.
Ander Añibarro Laudioko alkateak azaldu duenez, "baztertuta edota izkinatuta egon diren emakumeen aurpegiak, ahotsak, balioak eta funtzioak berreskuratu, zabaldu eta balioan jartzea da helburua. Baita emakumeen eta gizonen arteko aukera-berdintasunaren bidean gizartea sentsibilizatzea eta kontzientziatzea ere". “Erakusketa lagungarria izango da egungo errealitatea interpretatzeko, oroimen historikoa berreskuratzeko eta bizikidetzatik eta berdintasunetik abiatuta etorkizuna eraikitzeko”, gaineratu du Maite Cortazar Kultura zinegotziak.
Historia guzti horiek ezagutu nahi dituzten herritarrak Kultura Etxera joan ahal izango dira ohiko ordutegian, astelehenetik ostiralera, 10:00etatik 13:00etara eta 16:30etik 21:00etara; eta larunbatetan, 10:00etatik 13:00etara eta 17:00etatik 20:00etara. Kasinoko ateak 17:00etatik 20:00etara egongo dira zabalik ostiral eta larunbatetan.
Bestalde, Laudio Udalak ikasleekin joateko aukera eman nahi die herriko ikastetxeei, udalerriko gazteak sentsibilizatzeko asmoz. "Proiektua gure gizartea osatzen duten belaunaldiak hurbiltzeko bidea izango litzateke", adierazi du Loli Muriel Berdintasun zinegotziak.
Erakusketa bihar zabalduko da arratsaldeko 19:00etan Kasinoko terrazan.