EH Bildu Laudiok berrikuntzak sartu ditu 2022ko ordenantzen eztabaidan

EH Bildu Laudioko kideak, artxibo irudi batean. / EH Bildu

Udal diru sarrerak "modu justuan" handitzea proposatu du opozisioko taldeak.

Laudioko EH Bilduk proposamenak eta berrikuntzak aurkeztu ditu hasi berri den 2022ko ordenantza fiskalen eztabaidari begira, udal diru-sarrerak "modu justu" batean handitzeko helburuarekin.

Zentzu horretan, Laudioko Udalaren titulartasun lurretatik barrena garraiatzen den goi-tentsioko elektrindarragatik tasa berri bat kobratzea proposatu du opozisioko taldeak. Era berean, hutsik dauden etxebizitzen Ondasun Higiezinen Gaineko Zerga zamatzea planteatzen du, alokairuaren prezioa merketzeko asmoz.

Santi Hernando EH Bildu Laudioko zinegotziak hala azaldu du: “testuinguru orokorra kontuan hartu dugu beti gure proposamena egiteko. Azken asteotan eman den KPIaren igoera ikusita, bestelako irizpide bat jarraitzea planteatu dugu”.

Bestalde, gaur egun indarrean dauden hobariak handitzea proposatu du EH Bilduk, "gehien daukanak gehiago ordain dezan". Gainera, zergek eta tasek emakumeengan duten eragina aztertzeko eta eremu horretan hobekuntzak proposatu ahal izateko, Berdintasun legeak udal fiskalitatearen gainean agintzen duen genero-inpaktuaren txostena egitea eskatu du taldeak.

Halaber, Udal Gobernuak bere programan gazteei begira Ondasun Higiezinen Gaineko Zergan iragarri zituen hobariei buruz galdetu du alderdiak, baina Udal Gobernuak azaldu du legeak ez duela horrelakorik onartzen.

“Udal diru-sarrerak handitzea dugu helburu, beti ere, kalitatezko zerbitzu publikoak bermatzeko asmoz eta modu justuan eginda”, azaldu du Hernandok.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide