Tik-tokak eta podcastak lanabes, gazte etorri berriak euskarara batzeko

Tik-tok tailerra egingo dute gazteek, besteak beste. / Pixabay

"Euskara eskola ibiltaria" jarri du abian Amurrioko Udalak. Ordubeteko saioak eskainiko ditu astero, erabat doan. 

Euskaraz aritzeko podcast eta tik-tok lantegiak antolatu ditu Amurrioko Udalak, udalerrira iritsi berri diren DBHko ikasleentzat. Hala ere, 12 eta 16 urteko gazte orok parte hartu ahalko du egitasmoan. Euskaraz gozatu nahi izatea da baldintza bakarra. 

Gazteen artean euskarazko harremanak sustatzea da ekimenaren xedea. Horregatik, lantegi horiek ez dira eskoletan garatuko, Amurrioko hainbat gune irekitan baizik. Modu horretan, "eskola ibiltari" ereduan garatuko dute proiektua. 

Beste mota bateko ekintzak ere egingo dituzte: filma laburren grabaketa, jokoak eta ibilaldiak, besteak beste. Bederatzi astez luzatuko da ekimena, astero ordubeteko saioak eginda. 

Izen ematea, erabat doakoa

Izena emateko euskara@amurrio.eus helbidera bidali behar da mezua, parte hartzailearen izen abizenak, eskola, adina eta euskara maila (baxua, ertaina edo altua) zehaztuta. Inskripzioa erabat doakoa izango da, Arabako Foru Aldundiak finantzatu baitu. 

Urriaren 20an, hitzaldia

Eskola ibiltariaz gain, beste ekimen bat ere antolatu du udaleko Euskara Arloak datorren asterako. Euskaraz ez dakiten gurasoei bideratutako hitzaldia izango da, haurrei etxeko lanekin nola lagundu irakasteko. Urriaren 20an izango da zita, 18:00etan Kultura Etxean. Iñaki Eizmendik gidatuko du saioa. Parte hartzeko beharrezkoa izango da aurretik izena ematea, arestian aipatutako helbide elektronikora mezua bidalita. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide