Laudioko Udaleko Gazteria Arloak uda sasoian abian jarritako argazki eta bideo laburren lehiaketetako sari banaketa gauzatu dute gaur Lamuza Parkeko Kasinoan.
'Aisia Bizia Laudio' argazki lehiaketa 14 eta 25 urte arteko gazteei zuzendutako ekimena izan da. Pandemiaren gaiarekin erlazionatutako hainbat lan jaso dituzte, eta Beatriz Gines gaztearen argazkia izan da irabazlea. Ginesek 250 euroko saria eskuratu du. Bigarren postua Iratxe Letonarentzako izan da. Hirugarren sariak, aldiz, Julen Anda eta Andere Arriaga Santamariarentzat izan dira. Letonak 200 euroko saria eskuratu du, Andak eta Arriagak 50 euroko sari bana.
Gazteen talentua pantailara
Ikus-entzunezko 'Laudioko Izarrak' lehiaketan Ainara Alonsok eskuratu du 300 euroko lehenengo saria. Zuriñe Campok eta Izaro Akarregik, aldiz, 200 euroko sari bana eskuratu dute. Azkenik, Ibai Adrianek, Ander Trujillok eta Oier Perezek 100 euroko sariak eskuratu dituzte. Laudioko gazteen talentu eta gaitasunak bideoz jasotzea zen bideo lehiaketaren helburua.
Loli Muriel berdintasun zinegotziak oso positiboki baloratu ditu bi lehiaketak: “Laudioko Udalak horrelako lehiaketa bat diseinatu eta martxan jarri duen lehen aldia da. Egia esan, ezin gara pozago eta harroago egon gure gazteek erakutsi duten erantzun ona ikusita”.