Latiorro Ikastetxeko Gabonetako jaiotzaren patua hautsak harrotu ditu azken asteotan. Izan ere, hezkuntza zentroko klaustroa apaingarri hori jartzearen kontra agertu zen, horri buruz bozkatu ostean.
Erabaki horrek hedabidetara egin zuen salto eta horren ondoren, Bagara Guraso Elkarteak eskutitza idatzi dio Laudioko alkateari eta oharra zabaldu du erabakiaren kontra.
Polemikak polemika, Latiorro Ikastetxeak nabarmendu du gabonetako jaiotza jartzea erabaki partekatua dela eta Eskola Kontseiluan hartuko dela hurrengo astean
Polemika artifiziala
Edonola ere, Latiorro Ikastetxeko ordezkariek gogoratu dute klaustroak horren aurka bozkatzeak ez duela esan nahi Gabonetako jaiotza jarriko ez denik. Izan ere, erabaki hori Eskola Kontseiluari dagokio, non ikasleen familiek ere parte hartzen duten. Klaustroaren iritzia, finean, irakasleen jarrera islatzen du, baina erabakiak familiekin hartzen dira.
Bagara elkartearen oharra
Dena den, Gasteizko Bagara Guraso Elkarteak oharra plazaratu du klaustroaren jarrera salatzeko. Erlijio katolikoari lotutako entitateak bereziki azpimarratu du laizismoa eta laikotasuna ez direla gauza bera: "Laikotasunak, Europa osoan, erlijio-adierazpenak ahalbidetzen ditu, eta erlijioak, oro har, esparru publikoan. Bereziki, eskola-erakundearen esparrua. Horren ondorioz, gure herrietan jaiak ospatzen dira, erlijio-gertakariak ospatzeko, eta erlijioak eskolan irakastea onartzen da. Aitzitik, laizismoak, laikotasunak ez bezala, erlijioa plaza publikotik eta eskolatik kanpo uzten du. Hori da Frantziaren kasua, Europan ezohikoa dena".