Omnia taldeak oharra zabaldu du argitzeko zeintzuk izan diren bere proposamenak Laudioko Udal Taldeak egindako aurrekontuen zirriborroari.
Zehazki, alderdi independenteak honakoa iradoki du kultura, kirola eta jendartearen esparruetan: skate pista egokitzea, Laudioko Kulturzaleak elkarteak proposatutako ekintzak gauzatzeko bitarteko ekonomikoak ematea, kultura eta kirolera bideratzen den diru kopurua %10ean igotzea, eta 6.000 euro gehiagorekin babestea APILLen jarduera, orokorra izan dadin, eta ez soilik bazkideentzat.
Horrez gain, Jesus Guridi plaza konpontzea beharrezkotzat jo du alderdiak, baita parkean barandak jartzea, istripurik gerta ez daitezen eta jendea ibaiara erori ez dadin.
Bere proposamenak egin ez ezik, Omniak salatu du udal hiltegia berriro irekitzeko dirurik ez dela bideratu 2022ko udal aurrekontuen zirriborroan
Azkenik, geolokalizazio sistema digital bateratuaren garapena eskatu du, herritarrentzat eta nahi duenarentzat.
Udal hiltegia eta zergak
Bestalde, udal gobernu taldearen planteamendua kritikatu du Omniak. Hain zuzen, salatu du udal hiltegira begira ez dela inbertsiorik jaso. Hau da, azpiegitura itxita jarraitzeko hautua egin dela.
Bestalde, alderdi independenteak gogoratu du epaitegiek gainbalio zerga bertan behera utzi dutenez, udalak 400.000 euro gutxiago izango dituela. Hori konpontzeko Omniak uste du aukera onena dela errenta altuenak dituztenei Ondare Higiezin Zerga %10 igotzea, eta jarduera ekonomikoen zergaren presio fiskala areagotzea.