Urriaren 19tik azaroaren 3ra auzo batzarrak antolatu ditu Laudioko Udalak, herritarren kezkak eta iradokizunak jasotzea helburu. EH Bilduk salatu du udal gobernuak aurpegi garbiketarako baliatu dituela parte hartze foro horiek, eta ez dituela bertan jasotako ekarpenak kontuan hartu aurrekontuen proposamenean. Izan ere, auzo batzarren zikloa amaitu aurretik aurkeztu eta landu du aurrekontuen proposamen zirriborroa.
“Gure ustez, lehenengo pausu batean, herritarren iritziak, beharrak eta kezkak entzun behar dira, eta horrekin guztiarekin, ondoren, aurrekontuen proposamen zirriborroa landu, eta ez alderantziz” adierazi du Nagore Gomara zinegotziak. Herritarren ekarpenak jasotzeko epea abuztuan ireki izana ere kritikatu du udal talde abertzaleak. Urteko tarte hori hain prozesu estrategikoa garatzeko hilabete txarra dela azaldu du Gomarak.
Trabak partehartzeari
Herritarren parte hartzerako auzo batzarretan aurrez izena eman behar izana eta aforo muga mantentzea ere kritikatu du koalizioak. Eusko Jaurlaritzak edukiera mugak eta neurri murriztaileak kendu aurren, udalak mantendu egiten dituela argudiatu du Nagore Gomarak.
Azkenik, bandoen erabilera sustatzea proposatu dute auzo batzarren deialdia zabaltzeko: “Modu horretan, batetik, kontziliazioa eta, bestetik, herritar guztiei deialdia heltzen zaiela bermatzen da, eta arrakala digitalaren baitan sortutako desorekak saihesten ditugu. Adinduek zailtasunak izaten dituzte baliabide elektronikoak maneiatzen, eta herritar guztien esku jarri behar ditugu parte hartzea bultzatzeko erraztasunak” gaineratu du EH Bilduko bozeramaileak.