Herriko hainbat eragile eta elkarterekin bilerak egin ditu azken astean EH Bildu udal taldeak. Bira horretan, gizarte arloan lan egiten duten udalerriko elkarteek 2020az geroztik diru-laguntzak etenda dituztela egiaztatu duela azaldu du koalizioak. Horrek eragin zuzena du ere 2021eko laguntzetan. Izan ere, iazko diru-laguntzen justifikazioa ebatzi gabe egoteak eragotzi egiten du aurtengo laguntzen izapidetzea.
EH Bilduk kezka adierazi du egoera horrek elkarte eta eragileen biziraupenean duen eragin kaltegarria dela eta. Gizarte-ongizaterako zorroa bere ardurapean duen PSE-EE alderdiari erantzukizuna eskatu diote, gizarte-ekintza, gizarte-kalitatea, integrazioaren normalizazioa eta bizi-kalitatearen hobetzea helburu duten kolektiboei erantzunez.
"Gure ustez lehentasuna eman beharko litzaioke diru-sarrera horiek bermatzeari, talde hauen funtzionamendua ziurtatzeko eta, beraz, EH Bildutik gobernu taldeari eskatzen diogu diru-laguntza ordaintzeko beharrezkoak diren izapideak betetzen direla bermatzea" azaldu du Esti Gorostiaga zinegotziak. Udal-gobernuaren kudeaketa utzikeriatzat jo du Gorostiagak, eta gogorarazi du egoera honetan kolektibo ahulenak direla diskriminazioa jasaten dutenak.