Nola ospatuko da aurten Bizilagunak ekimena Laudion?
Laudioko Zurrumurruen Aurkako Taldeko kideek azken edizioan erabaki genuen jarduera kalera ateratzea eta ordura arte parte hartu genuen taldeak elkartzea: Gazte Asanblada, Lamuza Eskolako Guraso Elkartea, norbanakoak… ekimena ikusgarriagoa egiteko eta herritarrak parte hartzera animatzeko.
Aurten ospatzeko gogoz gaude, iaz pandemiagatik ospatu ezin izan ondoren.
Nola antolatzen zarete ekimena aurrera eramateko?
Ekimen hau herriko Zurrumurruen Aurkako Taldeak antolatzen du. Aldian-aldian biltzen gara ekimen hau eta beste batzuk antolatzeko, hala nola hitzaldiak, tailerrak eta abar, zurrumurru xenofoboei aurre egiteko helburuarekin.
Bizilagunak egitasmoa, antolatzen ditugun gainerako ekintzak ez bezala, udalerri guztietan egiten da aldi berean. Oso polita da pertsona pila bat batera gaudela jakitea, zerbait ospatzen xede berarekin.
Zuen ustez, zergatik da garrantzitsua parte hartzea?
Jende guztia animatu nahi dugu parte hartzera, elkartzea garrantzitsua dela uste baitugu. Ziur gaude zenbat eta jende gehiago ezagutu, orduan eta gehiago izango garela estereotipoak eta aurreiritziak albo batera uzteko gai beste pertsona batzuekin harremanetan jartzerakoan. Herritarron keinu bat izango da igandekoa, kulturen arteko bizikidetzaren alde eta diskriminazioaren aurka.