Laudioko Udal Hiltegiaren itxiera

Hiltegiaren itxiera kudeatzeko gaitasunik ez izatea leporatu diote EH Bilduk eta Omniak Udal Gobernu Taldeari

Udal hiltegiaren itxierak mobilizazioak eragin ditu Laudion. / Aiaraldea.eus

Oposizioko taldeek lehen lerrora ekarri dute berriro udal hiltegiaren itxiera eta zalantzan jarri dituzte EAJk eta PSE-EEk osatutako Udal Gobernu Taldeak emandako arrazoiak azpiegituraren jarduera behin betiko eteteko.

Udal hiltegiari buruzko adierazpen bateratua egin dute Lamia Arcas eta Alvaro Barrios EH Bildu eta Omniako bozeramaileek. Izan ere, oposizioko taldeak ez daude ados azpiegitura horren itxierarekin eta eztabaidaren ertz guztiak landu behar direla uste dute: “Ez dugu amore emango eta ez dugu utziko ahanzturan erortzen kasu honek dakartzan zalantza tekniko eta politiko guztiak argitu gabe”.

Arcasek eta Barriosek bi eremutan eragin dute bereziki. Alde batetik, uste dute hiltegia ixteko arrazoi nagusia, ekonomikoa, ezin dela justifikatu. Euren aburuz, instalazioak berritzeko proiektuaren lehen faseko lanak amaiatuta, isuri-parametroak beteko lirateke. Udal Gobernu Taldeak, ordea, bigarren eta hirugarren faseak ere bete nahi ditu.

Oposizioaren iritziz: "fase horiek dira hasierako proiektua garestitzen dutenak. Fase horiek gobernu-taldeak agintzen ditu, ordenantzek edo erakunde publikoek eskatu gabe".

Batzorde monografikoa

Bestalde, eztabaida publikoa ekiditea egotzi diote Omniak eta EH Bilduk Ander Añibarrori. Hain zuzen, alkateak urriko udalbatzan iragarri zuen batzorde monografikoa deituko zuela, azaltzeko zergatik ez den legalki bideragarria udal hiltegia berriro irekitzea. "Adierazpen horietatik hiru astera, oraindik ez da eperik finkatu hitzemandako bilerarako" adierazi dute alderdiek.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide