Laudioko EH Bilduko kideek prentsa oharra zabaldu dute jakinarazteko hamaika ekarpen egin dituztela 2022ko udal aurrekontuei dagokienez. Koalizioak azaldu du herriko elkarteekin batu dela horretarako.
Hurrengo proposamenak egin ditu:
- Eragileen diru-laguntzak handitzea, hainbat urtez ez baitira aldatu.
- Argindarraren prezioaren igoerari aurre egiteko bonoa sortzea.
- 18 eta 35 urte bitarteko gazteei bideratutako diru-laguntza abiatzea, etxebizitza alokairua ordaintzeko.
- Euskara ikasteko laguntzak handitzea.
- Ahalduntze eskola, berdintasun kontseilua eta emakumeen etxea bideratu eta gauzatzeko diru partidak areagotzea.
- Gizonentzako berdintasun partida eratzea.
- Kirol azpiegituretan hobekuntzak egiten jarraitzeko bitarteko ekonomikoak ematea.
- Hiltegia berriro irekitzeko dirua bermatzea.
- Hurrengo urteko aurrekontuetan herritarren partaidetza sustatzea.
Kritikak EAJ eta PSE-EEri
EH Bilduk ez du aukera galdu eta gogor kritikatu du egungo Udal Gobernu Taldearen kudeaketa eredua. Hain zuzen, EAJ eta PSE-EEri leporatu die zerbitzu publikoen pribatizazioaren bidea hartzea. "Hilerriaren kudeaketa, Enplegu Publikoaren Eskaintzaren garapena edota merkataritza sustatzeko jarduerak" dira horren adibide koalizio independentistarentzat.
Hori ez ezik, indarkeria matxistari aurre egiteko baliabideak murriztea ere egotzi die EH Bilduk jeltzale eta sozialistei: "Aurtengo proposamenean, udal gobernu taldeak, berriz ere, indarkeria matxista pairatu duten emakumeentzako laguntzak murriztu ditu. Errotik heldu beharreko pandemia da hau eta ezin dugu onartu indarkeria matxistari aurre egiteko diru kantitatea murriztea”.