HERIOTZAREN URTEURRENA

Enrique Urquijo; erro laudioarreko artista madarikatua?

Enrique Urquijo musikari madrildarra. / Pongamosquehablodemadrid.com

Aste honetan bete dira 22 urte Enrique Urquijo Los Secretos taldeko sortzailea hil zenetik. Bere heriotzari buruzko datu gehiago azaleratu dira, baina bere erro laudioarrak nahiko ezezagunak dira Aiaraldean.

Enrique Urquijo Los Secretos taldeko konpositorea eta gitarjolea 1999an zendu zen drogen gaindosi baten ondorioz Madrilen. Aste honetan bete da zoritxarreko efemeridearen 22. urteurrena eta bere ingurukoek zenbait datu gehiago eman dituzte bere bizitzako azken uneei buruz, ukatuta heroinak eragindako gaindosiak hil zuenik, eta azpimarratuta bestelako drogen presentzia bere gorpuan.

Madrilgo La Movida mugimenduan egondako musikariak -Tos, Los Secretos eta Los Problemas taldeetan- oso errotuta egon zen Espainiar Estatuko hiriburuan eta garaiko bestelako sortzaile ospetsuen laguna izan zen -Joaquin Sabina edo Antonio Vega-, baina urruneko harremana dauka Aiaraldearekin, laudioar baten ondorengoa izan baitzen.

Hala ere, eta bere abizenak iradoki dezakenaren aurka, Urquijo abizena ez zuen Laudiotik hartu. Hain zuzen, bere aitona (Manuel Urquijo Helguera) Castrokoa zen.

Eskualdera hain lotuta dagoen abizen hori ez bada sustrai horien arduradun, nor da ba? Erantzuna oso erraza da. Enrique Urquijoren amona, Elvira Grijalba, Laudion jaio zen. Bere ilobek gogoratzen zuten emakume langile baten moduan, beti etxean, eta hiru mende ezagutzeko aukera izan zuen. Alegia, Elvira 1896an etorri zen mundura eta 2001ean hil zen.

Denbora tarte horretan guda zibila bizi izan zuen, baita bere iloben arrakasta ere (Enrique Urquijorekin batera, Javier eta Alvaro Urquijok jotzen zuten Los Secretosen). Elkarrekin, bere ilobek sortu zituzten La Movidako  zenbait abesti esanguratsu (Déjame, esaterako).

Tamalez, iloben erruz une mikatzak ere ezagutu zituen, Enrique Urquijoren heriotzak hitzaurre luzea izan baitzuen, urte luzez drogen kontsumoak markatu baitzuen bere existentzia. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide