MARIDOMINGI ETA SORGINAK IKUSKIZUNA

Faktoriako plazan elkartuko da Maridomingi Aiaraldeko sorginekin abenduaren 23an

Maridomingi Faktoriara hurbilduko da abenduaren 23an. / Aiaraldea.eus

Maridomingiren ipuina eta ikuskizuna sortu ditu Kokoriko Hezkuntza Faktoriak. Abenduaren 23an aurkeztuko dute Maridomingi eta sorginak emanaldia, 18:00etan Faktorian.

Abenduaren 23an Maridomingi eta sorginak ikuskizuna eskainiko du Kokoriko Hezkuntza Faktoriak. 18:00etan izango da emanaldia, Faktorian bertan (Errotari kaleko 4-8 pabilioia, Laudio). "Erdigunean jarri nahi genuen Maridomingi, berari eta bere bizimoduari plaza eskaintzeko. Ez abenduaren 24an ezagutzen dugun Maridomingi hori, baizik eta egunerokoan aritzen dena", adierazi du Julene Onaindia Garciak.

Lantalde bat osatu dute horretarako, eta datorren asteko emanaldiaren prestaketa lanetan daude murgilduta egunotan. "Iaz Maridomingi protagonista duen ipuina sortzen hasi ginen, eta horren harira ikuskizun xumea egiteko aukera ikusi genuen", erantsi du, "Maridomingi Aiaraldeko sorginekin elkartuko da Faktoriako plazan, bera ere sorgina baita".

"Olentzeroren eskutik ordez, Aiaraldeko sorginen eskutik helduta azalduko zaigu. Emakumeen* indarra eta ahizpatasuna nabarmendu nahi ditugu"

Modu horretan nahi dute landu Maridomingiren egunerokotasuna, beste ikuspegi bat zabaltzeko, eta Maridomingi pertsonalki ezagutzeko: "Olentzeroren eskutik ordez, Aiaraldeko sorginen eskutik helduta azalduko zaigu. Emakumeen* indarra eta ahizpatasuna nabarmendu nahi ditugu".

Ildo beretik, erlijio kutsua alboratu nahi dute, eta "Gabonetako eskualdeko aintzinako tradizioa eta istorioak ezagutu".

Izen-ematea zabalik dago www.faktoria.eus atarian, eta ikuskizuna Aiaraldeko bizilagun guztiei zuzendua dago. "Euskara batzeko hitzordu hobezina da. Maridomingiri merezi duen plaza eta berotasuna eskainiko dizkiogu".

Maridomingi, erdigunean

Olentzerok hartu ohi du etxe guztietan protagonismoa gabon gauean, istorioetan duen presentzia ikusi baino ez dago horretaz jabetzeko. "Maridomingi toki askotan laguntzaile edo inkluso bikote moduan azaltzen zaie haurrei. Bigarren mailako pertsonaia da, bigarren mailako protagonismoarekin", kritikatu du Kokorikoko kideak. Errelato horrekin apurtu nahi izan dutek ekimenaren bidez, "Maridomingiren iruditegia zabaldu eta bestelako balio eta funtzio batzuk eman nahi izan dizkiogu. Oso gai da protagonista zein ekintzailea izateko, eta etxe zein bihotz guztietan poztasuna, berotasuna eta opariak banatzeko".

Abenduaren 23ko ekitaldia, ordea, neguaren hasiera baino ez da izango. Izan ere, abenduaren 27tik 31ra "Negulekuak" prestatu dituzte Faktorian Kokorikoko kideek: "Proiektuak bi ardatz ditu. Alde batetik, jolas eta mugimendu autonomoa; eta bestetik, natura eta kalea. Jolasean oinarrituko da proiektua, hainbat proposamen eskainiko zaizkie haurrei, eta bakoitzak zertan eta non jolastu nahi duen erabakiko du". Faktoria izango da topalekua, eta 9:00etatik 13:00ak arte iraungo dute ekintzek. Adin tarteari dagokionez, 3-12 urte bitartekoentzat egokituko dituzte txokoak.
 
Urte osoan zehar, 0-16 urte artekoentzat eskaintza andana dute Faktorian. "Erantzuna oso positiboa izaten ari da, oso pozik gaude. 0-3 urteko espazio askea, ludoteka, familian jolasean, ikuskizunak, zirku tailerra... Animatzeko gonbidapena egin nahiko genuke, etorri eta frogatu".
 
Proiektuen nondik norakoak jarraitzeko Faktoriako webgunea baliatzen dute, baina Whatsapp bidezko difusio taldeak ere erabiltzen dituzte. "Informazioa modu zuzenean jaso nahi izatekotan,kokoriko@aiaraldea.eus postara edo 722 22 75 32 telefono zenbakira mezua bidali, bertan, gure ekintzen berri eman eta izen emateko epeak zabaltzen ditugu eta".
 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide