Urte amaierak eginiko lanaren uzta itzuli dio Laudio Atletismo Klubari. Amurrion izan zen igandean norgehiagoka esanguratsuenetako bat, eta emaitza bikainak pilatu zituen talde laudioarrak. Euskadiko Kros Txapelketa eta Arabakoa jokatu ziren batera, Refor industriagunean egokitutako zirkuituan.
Arrate Talledo eta June Rivas, esaterako, lehenbiziko eta hirugarren postuetan sailkatu ziren euren kategorietan. Euskadiko sailkapenean, berriz, 10. eta 14. bukatu zuten, hurrenez hurren.
Lan handiaren erakusle
"Taldeka gauza handia lortu dugu, ondo ikusi daitezela gure sekulako kirolariak", adierazi du klubak sare sozialetan:
"Emaitza bikainekin gerra ematen jarraitzen dugu", erantsi dute. Indibidualki eta taldeka lehiatu zen kluba Amurrion. "Pena izan zen eskola kiroleko lagunek ezin parte hartzea, uholdeak medio".
Hargatik, balorazio oso positiboa egin du kirol eragileak: "18 urtez beherakoen artean lasterketa ona egin zuen Unaik, eta Gaizkak eta Naiak lehenengo bukatu zuten 20 urtez beherakoen lasterketa. 23 urtez beherakoen artean Ane podiumean sartu zen, eta Master kategorian Edu izan zen Arabako lehenbizikoa".
Bestalde, sare sozialetan gehitu dutenez, Malagako eta Logroñoko maratoi erdietan ere lehiatu dira klubeko zenbait kide.