Kultur sorkuntza Aiaraldean

‘Itziber’ proiektuaren lehen bideoklipa sareratu dute, elektronika, euskarazko letrak eta animazioa uztartuta

Itzi Azkaratek eta Alberto Villarrek sortu dute proiektua, eta lan gehiago prestatzen ari dira dagoeneko.

‘Itziber’ proiektua sortu dute Itzi Azkarate eta Alberto Villarrek. Agerian abestia grabatu eta bideoklipa plazaratu dute, Laudion grabatutako eszenak 3D animazioarekin uztartuta. 

Musika elektronikoa eta euskarazko letrak bateratu dituzte abestian, eta horrela egingo dute aurrerantzean ere. “Elkar ezagutzen genuen, eta behin Albertok bere abesti batean ahotsa jartzea eskatu zidan, horrela sortu zen proiektua”, azaldu du Itzi Azkaratek. Bera arduratu da letra egiteaz. “Harremanak ditu hizpide kantak, lagun, bikote zein senideen artekoak”, azaldu du abeslariak. 

Aurreratu duenez, sortu dute dagoeneko bigarren abestia. “Ahotsak grabatu ditugu, eta Laudioko Lamuza Parkeko Kasinoan egon ginen iragan igandean bideoklipa grabatzen”. Hala ere, oraindik ez dute sareratuko, “Albertok denbora nahiko beharko duelako abestia nahastu eta bideoko animazioak sortzeko”. Hirugarren abesti bat ere dute tintontzian, baina hori aurrerago garatuko dute. 

Proiektua kasualitatez sortu zela aitortu du Azkaratek, eta aitortu du ez dakiela zer nolako garapena izango duen. Hala ere, bi sortzaileek nahiko argi dute beti formula bera erabiliko dutela. Ez dute diskorik sortu nahi, animaziozko bideoklipak baizik. “Albertok elektronika jartzen dio proiektuari, eta nik rocka”.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide