Astelehenean Bilbon atxilotu zuen Ertzaintzak 18 urteko gaztea hiru lapurreta egiteagatik Laudion. Delitu guztiak indarkeria baliatuta gertatu ziren eta 4 zauritu utzi zituzten, gutxienez, eta bat, gainera, konorterik gabe.
Zehazki, abenduaren 12an jazo ziren gertakariak diskoteka beraren inguruan. Antza, atxilotuak ez zuen bakarrik parte hartu ekintzetan eta beste laupabost kide aritu ziren berarekin. Hori bai, poliziak leporatu dio taldearen burua izatea.
Atxilotuari leporatu diote talde baten burua izatea, eta bost gazte erasotu eta lapurtzea. Biktima batek konortea galdu zuen botila batekin kolpea jaso ostean.
Ertzaintzak adierazi duenez, hasteko, lepotik zintzilik zeraman urrezko katea kendu zioten taldeka lehenengo biktimari. Geroago, akusatuak burukada eman zion aurpegian beste gazte bati eta sakelakoa lapurtu zion.
Azkenik, pertsona berak eta beste laupabost erasotzailek hiru gazteren aurka jo zuten. Jipoitu ostean, telefonoak lapurtu zizkieten. Biktima batek lurrean bukatu zuen konorterik gabe, buruan kolpe bat jaso baitzuen botila batekin.
Aurrekariak eta atxilotze aginduak
Atxiloketa gauzatzeko, Ertzaintzak Laudioko Udaltzaingoaren eta zenbait herritarren laguntza jaso du, eta horri esker identifikatu dute akusatua. Poliziak jakinarazi du aurrekari ugari dituela atxilotuak, 18 urte izan arren. Hain zuzen, bi atxilotze agindu zituen bere gain jadanik. Zehazki, lapurreta eta eraso delituak egotzi dizkiote.
Halaber, Ertzaintzak azaldu du lanean ari dela gainerako erasotzaileak identifikatzeko.