Gabon zahar eguneko baserritar eta artisauen azoka egin dute gaur goizean Laudioko Aldai plazan. Dozenaka postu egon dira, eta ehunka lagun bertaratu dira produktuak ikusi eta erostera.
Izar Mendiguren eta Oihane Perea bertsolariek girotu dute goiz eguzkitsua. Eurek eman diote paso herriko baserritarrak omentzeko ekitaldiari.
Marisol Respaldiza eta Jesus Mari Oruetari egin diete aitortza aurten. Laudioko Larrazabal auzoko Ostenko baserrian jaio zen Orueta, eta Okondoko Ugalde auzoko Landeta baserrian, aldiz, Respaldiza. Eurak arduratzen dira Laudioko San Blas feriako txerria hazteaz , eta taloak prestatzeagatik ere dira ezagunak.
Horrez gain, Arateren (Arabako artzain txakurren aldeko elkartea) sortzaileak ere badira, eta urtero laguntzen dute artzain txakurren lehiaketaren antolakuntzan.
Bilobekin igo dira bi omenduak oholtzara, eta argazkia egin dute gero familia osoarekin. Marisol Respaldizak hartu du hitza ekitaldiaren amaieran, Laudioko Udal Hiltegia berriz zabaldu behar dela aldarrikatzeko.