Laudioko Udalak onartutako ordenantza berria baztertzailea dela salatu dute Laudioko ostegunetako azokako merkatariek. Merkatuko lizentziak 2009an entregatu ziren, orduan onartutako ordenantza izan da gaur egun arte indarrean mantendu dena. Lizentziek 5 urteko jarduera arautzen zuten, eta bi aldiz berritua izan da (2014 eta 2019. urteetan).
Gauzak horrela, 2024ra arte azokan aritzeko baimena zuten merkatariek, 2021ean Laudioko Udalak ordenantza berria onartu zuen arte. "Ordenantza berria merkatarion antzinatasuna errespetatu gabe osatu da, eta baztertzailea da askorentzat" adierazi dute ostegunetan postua jartzen duten hainbat saltzaileek.
Araudi berriak 12 urteko esperientzia eskatzen die merkatariei salmenta ibiltariaren arloan, eta saltzaileen kexa eragin du horrek: "araudi berriak aukerarik gabe uzten ditu merkatari berriak, jende gaztea... merkatuan aritzen diren askok postua galduko dute".
Udalarekin bilerak
Ordenantza berriak onartuko zirela jakitun, Udal Gobernuarekin bilera egin zuten Laudion postua jartzen duten hainbat saltzaile ibiltarik. Aiaraldea Komunikabideari azaldutakoaren arabera, orain arteko postuak errespetatuko zituela adierazi zien tokiko erakundeak. "Ez dute hitza bete eta araudi baztertzailea onartu dute" adierazi dio saltzaile batek komunikabideari.
Bigarren bilera bat eskatu zuten, baina udalak uko egin zion batzartzeari: "Ez zuten gutaz ezer jakin nahi". Hori dela eta, hainbat merkatarik epaitegietara jo zuten errekurtsoa aurkeztera. "Akordioa bilatzen saiatu gara, baina Udal Gobernuak ez du nahi izan. Gaur gaurkoz epaileak ordenantza berria kautelazko neurri gisa bertan behera uzteko zain gaude".
Bien bitartean, sinadura bilketa abiatu dute, eta ostegun honetan -urtarrilak 14- entregatuko dituzte udaletxean. "Gure lanpostuak defendatzen ari gara, batzuek gu langileak ez garela pentsatu arren. Merkatua debaluatzen ari dira hartutako erabakiarekin".