Europako Batzordera iritsi da Laudioko Udaleko hizkuntza eskakizunaren aurkako epaiaren afera. Izaskun Bilbao Barandica eurodiputatu jeltzaleak gaiari lotutako hainbat galdera plazaratuko ditu erakundean.
Iragan astean ezagutzera eman zen epaiaren nondik norakoak azaldu ditu Alderdi Jeltzaleko ordezkariak Bruselasen. Bere ustez, epai hori “goragoko instantzietan” baliogabetuko dute, hizkuntza eskakizuna betetzera iristen diren gainontzeko langileen eskubideak urratzen dituelako.
Hala ere, fokua beste kontu batean jarri du Bilbaok: euskara “munduko bost hizkuntza zailenen artean” dagoenaren ustea, epaiak hori argudiatzen zuelako.
Horri lotuta, hiru galdera egin ditu ordezkari jeltzaleak batzordean:
- Europako Batasunak hizkuntzak zailtasunaren arabera zailkatzeko irizpiderik erabiltzen duen.
- Epaiak aurrekaririk duen Europar Batasunean. Hau da, hizkuntza bat oso zaila izatea ea inoiz arrazoia izan den Batasunean lehiaketa publiko bat bertan behera uzteko.
- Hizkuntza bat ezagutzeak dakarren “zailtasuna” kontuan hartzen den Europako erakundeek langileak aukeratzeko egiten dituzten prozesuetan.
Epaiak “euskara ikasi duten eta aukeraketa prozesu guztiak gainditu dituzten milaka pertsonen eskubideak” urratzen ditu, Bilbaoren aburuz. Horri lotuta, EAJko ordezkariak nabarmendu du hizkuntza zaila izatea ez dela inoiz eragozpena izan.
Horrez gain, eurodiputatuak salatu du Gasteizko epailearen erabakiak “elebitasunaren gaineko oinarrizko adostasunak hankaz gora” jartzen dituela, eta gaineratu du gertatutakoa “arbitrariotasun ariketa arriskutsua” dela, “funtzio publikoan sartzeko prozesuetan sekula eman ez dena”.
Hizkuntza bat ‘ikasteko zaila’ izatea “kontzeptu subjektiboa” da, politikariaren ustez, “epaile andreak bere erabaki harrigarria justifikatzeko erabiltzen duen txosten fantasmagorikoa bezala”. Bilbaoren arabera, “eskandalagarria” izango litzateke ezagutzaren irizpidea opozisio batean eskatzen den beste edozein eskakizuni aplikatzea. “’Kasualitatez’, euskara da, berriz ere, jarduteko molde honen biktima”, ondorioztatu du.