Latir izeneko diskoa plazaratu du Jon Morenok, Onix ezizenarekin. Bere bakarkako lehen lana izan da, eta lekukoa hartu dio duela bi hamarkada hasitako ibilbideari. “15-16 urte nituela hasi nintzen raparen munduan, El Problema-rekin”, azaldu du musikari laudioarrak. Bere hitzetan, aintzidaria izan zen talde hori Aiaraldean. “Garai hartan bazeuden raperoak eskualdean, baina talderik ez”.
Gaztetako garai horietara itzuli da Onix argitaratu berri duen diskoarekin. “15 urte nituela idatzitako zenbait errima berreskuratu ditut”. Aita izan zenean etorri zitzaion inspirazio olatua, duela bi urte. “Idazten hasi nintzen, eta hortik sortu zen diskoa”.
Soinu klasikoak
Gai sozialak dira nagusi Onixen letretan. Formatuari dagokionez, “eskola zaharreko” estiloaren alde egin du musikariak. “Orain fast food musika nagusitu da. Musikariek singleak plazaratzen dituzte bideoklipekin, baina nik argi nuen disko formatuan plazaratu nahi nuela”. Beat eta tempo klasikoak baliatu ditu, gaztetan entzuten zituen doinuen erroetara itzuliz.
Proiektu gehiago
El Problema taldea desegin zenean utzi zion Onixek rapeatzeari, baina ez zen musikatik aldendu. Metal eta hardcore doinuetan murgildu zen, baxujole moduan. Egun, estilo horretako lau taldeetan dago jotzen, eta rapeatzen ere jarraitu nahi du. Bigarren diskoa prestatzen dago dagoeneko. “Bost abesti ditut prest. Ez dakit nola egingo dudan talde guztiak eta aitatasuna uztartzeko!”.
Youtube, Spotyfin eta Bandcamp plataformetan entzun daiteke diskoa osorik.