Laudioko Pentsiodunek adierazpena egin dute baloratzeko euren partaidetza otsailaren 28ko udalbatzan. Alde batetik, kolektiboak eskertu du EH Bilduren eta Omniaren aldeko botoa eta PSE-EEren abstentzioa.
Plataformak, ordea, ezustea agertu du EAJk mozio alternatiboa proposatu zuelako aurretik ezer aipatu gabe. Horregatik, pentsiodunek kritika zorrotza egin diete jeltzaleei: "Osoko bilkuraren egunean bertan mozio alternatibo bat aurkezteak, kontsultarik egin gabe balizko akordio baten bila, gure udalean gobernu-talde honekin aplikatzen den 'demokratizazio handia' ikustarazten digu. Lehenagoko garaietan erabilitako adagio zaharra dirudi. Gure mozioarekin ados daudela esan dute, baina beraiena ez denez, beste mozio alternatibo bat asmatu egiten dute jatorrizkoa ez bozkatzeko".
Edonola ere, ekimenaren muinari dagokionez, erretiratuek honakoa azaldu dute: "testuan gure kexak islatzen ziren tratu iraingarriagatik, mota guztietako zerbitzuengatiko komisioak kobratzeagatik, ordutegi-mugengatik eta, batez ere, adinekoentzako banku-zerbitzuak digitalizatzeak ekarri dizkigun oztopo teknologikoengatik".
Halaber, kolektiboak mesfidantzaz hartu du bankuek iragarri dituzten neurriak egoera konpontzeko: "Udalbatzan esan genuen bezala, ez gara bankuez fidatzen, beti engainatu gaituztelako, eta zerbait egiten badute, epe ertainera interes ezkuturen bat dutelako da. Zain geratzen gara, zer neurri hartzen dituzten eta neurri horiek iraunkorrak edo aldi baterakoak diren ikusteko".