Laudioko Udalak atzo azaldu zuen herriko Kultura Plana laster sartuko dela indarrean. Izan ere, Kultura Kontseiluaren proposamena onartu zuen udalbatzak urtarrilean eta martxoaren 31n amaituko da epea ekarpenak egiteko. Hori egin ostean, berehala irekiko dute deialdia interesdunek izena emateko eta parte hartzeko.
Kontseilu horren eginkizuna izango da, hain zuzen, atzo aurkeztutako planaren jarraipena egitea, hemendik eta 2025era bitarteko kronograma eta helburuak bete daitezen. Hainbat xede eta ekintza aurreikusi dituzte, baina garrantzitsuenen artean dago, dudarik gabe, diru-laguntzen eredua aztertzea, partaidetza baliatuta.
Horrez gain, planaren ardatzak dira herriko kultura ehuna eta sormena indartzea, kultura egitaraua aberastea diziplina berriekin, herritarrei zabaltzea egiten diren jarduerak eta azpiegiturak egokitzea. Halaber, planak sustatu nahi duen kultura mota da elkarlanean landutakoa, euskalduna, tokikoa eta erakargarria.
Planak txertatu duen berritasun garrantzitsua izango da ere kultura kudeatzailearena. Udal egituraren barruan, bere eginkizuna izango da udalerriko programazio kulturala prestatzea, taldeekin harremanetan egotea eta Laudion bideratzeko jarduera kulturalak bilatzea.
Adostasuna eta partaidetza
Ander Añibarro alkateak eta Maite Cortazar zinegotziak eskaini zuten atzo prentsaurrekoa eta biek nabarmendu zuten plan estrategikoa adostasun zabala lortzeko gai izan dela, bai udalbatzan -aho batez onartu zuten- zein kultura taldeen artean.
Cortazarrek gogoratu zuen parte hartze prozesu luzea egin dela udal teknikari zein kultura sortzaileekin eta aipatu zuen abiapuntuan bertan, diagnosian, irakurketa oso antzekoa izan zela guztien aldetik. Berez, ariketa horretan ahulguneak, indarguneak, aukerak eta mehatxuak identifikatu zituzten eta nagusienak hurrengoak izan ziren:
Ahulguneak:
- Azpiegituren egoera
- Jende berak parte hartzen duela oro har emanaldietan
- Informazio falta
Indarguneak:
- Egitarau zabala
- Artisten konpromisoa
- Azpiegitura ugari
- Ekintza anitzak
Mehatxuak:
- Dinamika politiko eta sozial konplexuak
- Mesfidantza erakundeei dagokionez
- Belaunaldien arteko haustura
- Bilboko hurbiltasuna eta hango kultura eskaintza
Aukerak:
- Laudio Antzokia
- Erakundeekin harremanak hobetzeko parada
- Finantzazioa lortzeko aukerak
- Kultura Etxea
- Kanpoko jendea erakartzen duela Laudiok
- Artista garrantzitsuak eta konprometituak