Poloniatik itzultzen ari da une honetan Juan Francisco Gonzalez gidari laudioarra, bere taxiarekin. “Laster iritsiko gara Irunera, eta Madrilera joko dugu zuzenean”, azaldu dio telefonoz Aiaraldea Komunikabideari.
Ez doa bakarrik: beste gidari bat du bidelagun, txandaka gidatzeko, eta bost ukrainiar ere datoz eurekin. “Ama bat eta bi seme alabak eta beste ama bat bere semarekin”, zehaztu du Laudioko bizilagunak. Nabarmendu duenez, ametako bat alargun geratu berri da. “Atzo deitu zioten bere senarra hil dela esateko”.
33 taxi joan dira guztira Polinia eta Ukraina arteko mugara, eta 123 pertsona jaso dituzte bertan. Ukrainako errefuxiatuentzat Madrilen atondutako gunera eramango dituzte guztiak. “Batzuk Frantzia iparraldean geratu nahiko lukete, baina ezin ditugu bertan utzi, Ukrainako Kontsulatuak denak Madrilera eramateko agindua eman duelako”.
“Nire taxian datorren emakumeetako bati atzo deitu zioten bere senarra hil dela esateko”
20.000 kilo material
Poloniara ez dira esku hutsik joan txai-gidariak. 20.000 kilo material eraman dituzte, laguntza humanitario moduan. “Nik zerbait egin nahi nuen, baina Laudion ez zegoen ekimenik. Horregatik, Madrilera jo nuen, Taxi Federazioa zerbait antolatzen ari zela nekielako”.
Oso hunkituta azaldu da Gonzalez. “Izugarria da bertan dagoena, ikusi behar da benetan jakiteko. Pabilioi batean dute sartuta jende guztia, eta guztiek nahi dute beste edozein herrialdera joan. Milaka eta milaka pertsona dira”.
