Udaberria hasi da eta geroz eta ohikoagoak bilakatzen ari dira egun beroak. Baina tenperatura igoerek oso bestelako fenomeno bat ekarri ohi dute Laudioko zenbait zonaldetara: ibai ertzetako usain txarrak.
Gai hori izan zuten hizpide atzo Laudioko Udal Osoko Bilkuran. Omniako kideek galdetu zioten gaiaren inguruan udal gobernuari, eta Joseba Amondok eman zituen hartuko dituzten neurrien berri.
Zinegotziak azaldu duenez, herriko hiru zonaldetan lokalizatu dituzte arazoak. Urumea kalean dago horietako bat. “Apurketa batek eragin ditu usain txarrak, eta Urbide arduratuko da horiek konpontzeaz. Aste honetan bertan hasiko dira lanean, usain txarrak Jose Arrue kalerantz atera ez daitezen”.
Virgen del Carmen kaleko usain txarrei dagokionez, etxebizitza berrien promotoreekin jarri da udala harremanetan. “Lokal komertzialetan dagoen arazo bat da, eta eurek konpondu behar dute”, zehaztu zuen Amondok.
Horrez gain, Aldaikoerrekako zonaldean ere jaso dituzte bizilagunen kexak, aparkalekuaren zonaldean. “Urbidek esan digu lokalizatuta duela arazoa. Arazo handiagoa da, obra handiago bat ekarriko duena Motxotekale kalean. Ahal bezain laster bideratuko da”.