Apirilaren 11n zabalduko ditu ateak Laudioko Udal Liburutegi berriak. Azpiegitura Lamuza Parkeko Frontoi Etxean egongo da aurrerantzean. Ordezkari instituzionalek martxoaren 31n bisitatu zuten kokapen berria. Bertan egon ziren Ramiro Gonzalez Arabako Diputatu Nagusia eta Ander Añibarro Laudioko alkatea, besteak beste. Ate irekiak ere egin izan dituzte asteburuan, herritarrek espazioa ezagutzeko aukera izan zezaten. Gainera, kultur zikloa abiatuko dute herriko idazleekin eta ipuin kontalariekin.
44.000 bolumen hiru solairutan
Hiru solairu erabilgarri izango ditu Udal Liburutegi berriak, eta 40.000 bolumen baino gehiago gordeko dituzte bertan. Beheko solairuan harrera nagusia, eremu digitala, irakurketa-gunea eta ume eta gazteentzako espazioak atondu dituzte. Eguneroko prentsa, aldizkariak eta ikus-entzunezko materiala, umeentzako materiala eta kontsulta-liburuak ere bertan izango dira; baita irakurketa feministen txoko morea ere.
Lehengo eta bigarren solairuek 130 metro koadroko azalera dituzte, eta bietan egongo dira ikasteko eta irakurtzeko guneak. Edukiei dagokionez, helduentzako eleberriak, poesia, antzerkia, saiakerak, biografiak eta komikiak egongo dira lehenengoan. Bigarrenean, ordea, hizkuntzei, oposizioei eta espezializatutako ikasgaiei lotutako materiala egongo da.