Sute handia jazo da Garnica enpresan. 'Maderas de Llodio' izenarekin da ezaguna lantegia herrian zein eskualdean, eta Gardea industriagunean kokatua dago, Santa Kurutze ermitatik gertu.
"5:30ean piztu da alarma, eta horregatik joan gara langileak zer gertatzen zen ikustera. Berez, ez dakigu arrazoia, baina bat-batekoa izan da sutea, oso arin zabaldu da sua barruan eta kanpoan", adierazi dio Aiaraldea Komunikabideari bertako langile batek. Tarte gutxitan kalte handiak eragin ditu. "Arrazoi zehatza ez dakigu, baina hipotesi desberdinak ditugu langileek: argindar kuadroak edo oliodun galdarak hartu du su, bat-batekoa izan da", erantsi du.
Minutu gutxiren buruan heldu dira suhiltzaileak, eta Arabako zein Bizkaiko beharginak aritu dira elkarlanean. Horrez gain, Ertzaintza eta larrialdi zerbitzuak ere bertaratu dira, baina ez da zauriturik egon. "Sua kontrolatzea eta itzaltzea pixka bat kosta zaie, 40-45 minutu inguru egon dira", zehaztu du beharginak.
200 langile inguru ditu gaur egun Garnica fabrikak, eta istripuaren unean 45 inguru zeuden: "errelebo momentuan izan da, 15 bat genbiltzan lanean, eta 30 lankide arropak jantzi berri harrapatu ditu".