Andere Abesbatzak kontzertua eskaini du gaur goizean Gardeako parrokian. Modu horretan eman diete hasiera 2022ko Gardeako jaiei. Hainbat udal ordezkari egon dira kontzertuan. Horren ostean, Arloteek kantuz girotu dute gizarte etxean egindako hamaiketakoa.
Egitaraua asteburuan
Laudioko Udalak egitaraua prestatu du aurtengo Gardeako jaietarako. Asteburuan burutuko dituzte jarduera guztiak. Ostiralean Santa Kurutz Bola Sari Handia jokatuko dute auzoko bolatokian, 18:00etatik aurrera.
Larunbatean bola txapelketarekin jarraituko dute goizean. Padel txapelketa ere ospatuko dute kirol-gunean 11:00etan, eta 13:00etan tenis klase irekiak eskainiko dituzte. Eguerdian kalejira egingo du San Roke Musika bandak Bide Zaharretan zehar.
Haurrek ere izango dute dibertitzeko aukera. 17:00etan Galtzagorrik buruhandiak aterako ditu kalera, eta 18:00etan txokolatada egingo dute. 18:30etan DJ Kakutsen musika jartzaileak haurrentzako diskodantza zuzenduko du. Egunari amaiera emateko, Hodei Magoak adin guztientzako ikuskizuna eskainiko du.
Igandean itxiko dute jaien egitaraua. Lankaietako Lagunek kalejira egingo dute goizeko lehen orduan auzoa musikaz esnatzeko. Itxarkundiak dantza emanaldia eskainiko du 12:00etan. Blle & Blue orkestrak agurtuko ditu jaiak, 18:00etan gizarte etxean eskainiko duen kontzertuan.
Argazkiak: Antonio Muñoz